ወእምድኅረ ፡ መዋዕል ፡ ነሥአ ፡ ወልድየ ፡ ማቱሳላ ፡ ለወልዱ ፡ ላሜክ ፡ ብእሲተ ፡ ወፀንሰት ፡ እምኔሁ ፡ ወወለደት ፡ ወልደ ።   

2. ወኮነ ፡ ሥጋሁ ፡ ጸዐዳ ፡ ከመ ፡ አስሐትያ ፡ ወቀይሕ ፡ ከመ ፡ ጽጌ ፡ ረዳ ፡ ወፀጕረ ፡ ርእሱ ፡ ከመ ፡ ፀምር ፡ ጸዐዳ ፡ ወድምድማሁ ፡ ወሠናይ ፡ አዕይንቲሁ ፡ ወሶበ ፡ ከሠተ ፡ አዕይንቲሁ ፡ አብርሃ ፡ ኵላ ፡ ቤተ ፡ ከመ ፡ ፀሐይ ፡ ወፈድፋደ ፡ በርሀ ፡ ኵሉ ፡ ቤት ።   

3. ወሶበ ፡ ተንሥአ ፡ እምእዴሃ ፡ ለመወልዲት ፡ ከሠተ ፡ አፉሁ ፡ ወተናገረ ፡ ለእግዚአ ፡ ጽድቅ ።   

4. ወፈርሀ ፡ ላሜክ ፡ አቡሁ ፡ እምኔሁ ፡ ወጐየ ፡ ወመጽአ ፡ ኀበ ፡ አቡሁ ፡ ማቱሳላ ።   

5. ወይቤሎ ፡ አነ ፡ ወለድኩ ፡ ወልደ ፡ ውሉጠ ፡ ኢኮነ ፡ ከመ ፡ ሰብእ ፡ አላ ፡ ይመስል ፡ ደቂቀ ፡ መላእክተ ፡ ሰማይ ፡ ወፍጥረቱ ፡ ካልእት ፡ ወኢኮነ ፡ ከማነ ፡ ወአዕይንቲሁ ፡ ከመ ፡ እገሪሁ ፡ ለጸሐይ ፡ ገጹ ፡ ስቡሕ ።   

6. ወይመስለኒ ፡ ከመ ፡ ኢኮነ ፡ እምኔየ ፡ አላ ፡ እመላእክት ፡ ውእቱ ፡ ወእፈርህ ፡ ከመ ፡ ኢይትገበር ፡ መንክር ፡ በመዋዕሊሁ ፡ ዲበ ፡ ምድር ።   

7. ወይእዜኒ ፡ ሀለውኩ ፡ አቡየ ፡ አስተበቍዐከ ፡ ወእስእል ፡ እምኀቤከ ፡ ከመ ፡ ትሑር ፡ ኀበ ፡ ሄኖክ ፡ አብነ ፡ ወትስማዕ ፡ እምኀቤሁ ፡ አማነ ፡ እስመ ፡ ውእቱ ፡ ምስለ ፡ መላእክት ፡ ምንባሩ ።   

8. ወሶበ ፡ ሰምዐ ፡ ማቱሳላ ፡ ነገረ ፡ ወልዱ ፡ መጽአ ፡ ኀቤየ ፡ ውስተ ፡ አጽናፈ ፡ ምድር ፡ እስመ ፡ ሰምዐ ፡ ከመ ፡ ህየ ፡ ሀሎኩ ፡ ወጸርሐ ፡ ወሰማዕኩ ፡ ቃሎ ፡ ወመጻእኩ ፡ ኀቤሁ ፡ ወእቤሎ ፡ ናሁ ፡ ሀለውኩ ፡ ወልድየ ፡ እስመ ፡ መጻእከ ፡ ኀቤየ ።   

9. ወአውሥአኒ ፡ ወይቤ ፡ በእንተ ፡ ነገር ፡ ዐቢይ ፡ መጻእኩ ፡ ኀቤከ ፡ ወበእንተ ፡ ራእይ ፡ ዕፅብ ፡ በዘቀረብኩ ።   

10. ወይእዜኒ ፡ አቡየ ፡ ስምዐኒ ፡ እስመ ፡ ተወልደ ፡ ለላሜክ ፡ ወልድየ ፡ ወልድ ፡ ዘኢኮነ ፡ አምሳሉ ፡ ወፍጥረቱ ፡ ከመ ፡ ፍጥረተ ፡ ሰብእ ፡ ወኅብሩ ፡ ይጸዐዱ ፡ እምአስሐትያ ፡ ወይቀይሕ ፡ እምጽጌ ፡ ረዳ ፡ ወፀጕረ ፡ ርእሱ ፡ ይጸዐዱ ፡ እምጸምር ፡ ጸዐዳ ፡ ወአዕይንቲሁ ፡ ከመ ፡ እገሪሁ ፡ ለፀሐይ ፡ ወከሠተ ፡ አዕይንቲሁ ፡ ወአብርሃ ፡ ኵላ ፡ ቤተ ።   

11. ወተንሥአ ፡ እምውስተ ፡ እዴሃ ፡ ለመወልዲት ፡ ወፈትሐ ፡ አፉሁ ፡ ወባረኮ ፡ ለእግዚአ ፡ ሰማይ ።   

12. ወፈርሐ ፡ አቡሁ ፡ ላሜክ ፡ ወጐየ ፡ ኀቤየ ፡ ወኢአምነ ፡ ከመ ፡ እምኔሁ ፡ ውእቱ ፡ አላ ፡ አምሳሎ ፡ እመላእክተ ፡ ሰማይ ፡ ወናሁ ፡ መጻእኩ ፡ ኀቤከ ፡ ከመ ፡ ታይድዐኒ ፡ ጽድቀ ።   

13. ወአውሣእኩ ፡ አነ ፡ ሄኖክ ፡ ወእቤሎ ፡ ይሔድስ ፡ እግዚእ ፡ ሐዲሳተ ፡ ዲበ ፡ ምድር ፡ ወዘንተ ፡ ወዳዕኩ ፡ ወርኢኩ ፡ በራእይ ፡ ወአይዳዕኩከ ፡ እስመ ፡ በትውልዱ ፡ ለያሬድ ፡ አቡየ ፡ አኅለፉ ፡ ነገሮ ፡ ለእግዚእ ፡ እመልዕልተ ፡ ሰማይ ።   

14. ወነዮሙ ፡ ይገብሩ ፡ ኀጢአተ ፡ ወየኀልፉ ፡ ሥርዐተ ፡ ወምስለ ፡ አንስት ፡ ተደመሩ ፡ ወምስሌሆን ፡ ይገብሩ ፡ ኀጢአተ ፡ ወአውሰብ ፡ እምኔሆን ፡ ወእምኔሆን ፡ ወለዱ ፡ ደቂቀ ።   

15. ወሐጕል ፡ ዐቢይ ፡ ይከውን ፡ ዲበ ፡ ኵሉ ፡ ምድር ፡ ወማየ ፡ አይኅ ፡ ይከውን ፡ ወሐጕል ፡ ዐቢይ ፡ በ፩ዓመት ፡ ይከውን ።   

16. ዝውእቱ ፡ ወልድ ፡ ዘተወልደ ፡ ለክሙ ፡ ውእቱ ፡ ይተርፍ ፡ ዲበ ፡ ምድር ፡ ወ፫ደቂቁ ፡ ይድኅኑ ፡ ምስሌሁ ፡ ሶበ ፡ ይመውቱ ፡ ኵሉ ፡ ሰብእ ፡ ዘዲበ ፡ ምድር ፡ ይድኅን ፡ ውእቱ ፡ ወደቂቁ ።   

17. ይወልዱ ፡ ዲበ ፡ ምድር ፡ እለ ፡ ያርብሕ ፡ አኮ ፡ ዘመንፈስ ፡ አላ ፡ ዘሥጋ ፡ ወይከውን ፡ መቅሠፍት ፡ ዐቢይ ፡ ዲበ ፡ ምድር ፡ ወትትሐፀብ ፡ ምድር ፡ እምኵሉ ፡ ሙስና ።   

18. ወይእዜኒ ፡ አይድዕ ፡ ለወልድከ ፡ ላሜክ ፡ እስመ ፡ ዘተወልደ ፡ ወልዱ ፡ ውእቱ ፡ በጽድቅ ፡ ወጸውዕ ፡ ስሞ ፡ ኖኅ ፡ እስመ ፡ ውእቱ ፡ ይከውን ፡ ለክሙ ፡ ተረፈ ፡ ወውእቱ ፡ ወደቂቁ ፡ ይድኅኑ ፡ እሙስና ፡ እንተ ፡ ትመጽእ ፡ ዲበ ፡ ምድር ፡ እምኵሉ ፡ ኀጢአት ፡ ወእምኵሉ ፡ ዐመፃ ፡ እንተ ፡ ሀለወት ፡ ትትፌጸም ፡ ዲበ ፡ ምድር ፡ በመዋዕሊሁ ።   

19. ወእምድኅረዝ ፡ ትከውን ፡ ዐመፃ ፡ ፈድፋደ ፡ እምእንተ ፡ ተፈጸመት ፡ ቀዳሚ ፡ ዲበ ፡ ምድር ፡ እስመ ፡ አአምር ፡ ምሥጢራተ ፡ ቅዱሳን ፡ እስመ ፡ ውእቱ ፡ እግዚእ ፡ አርአየኒ ፡ ወአይድዐኒ ፡ ወበጸፍጸፈ ፡ ሰማይ ፡ አንበብኩ ።